Орусиянын жарандыгын алган мушкер Рой Жонс Москвада беттеш өткөрүп, атаандашына нокаут менен утулду (фоторепортаж)

Орусиянын жарандыгын алган америкалык мушкер Рой Жонс 12-декабрда Орусиянын желеги астында алгачкы беттешин өткөрдү. 46 жаштагы Рой Жонс британиялык Энцо Маккаринелли менен беттешип, 4-раундда нокаутка учурады. Бул тууралуу орусиялык басылмалар кабарлашты.

Маалыматка ылайык, мушкерлер Бүткүл дүйнөлүк бокс ассоциациясы (WBA) менен чемпиондук наам боюнча макулдаша алышкан эмес. Ошол себептүү бул беттеш чемпиондук статуска ээ эмес болчу. Мушкерлер рингге чыккандан тарта Рой Жонс активдүү болуп, алгач мыкты формада экенин көрсөттү. Орусиялык бокс сүйүүчүлөрү Ройго жан тартып, катуу сүрөөнгө алышты. Рой Жонс 4-раундда коргонууга туруп, атаандашынын арты-артына чабуул уюштуруусуна жол берип койду. Бул кечирилгис катаны атаандашы пайдаланып, таамай сокку узатуу менен аны терең нокаутка учуратты.

Кошумчалай кетсек, Р.Жонс Орусиянын жарандыгын ушул жылдын октябрь айында алган. Ал профессионалдык рингде түрдүү салмак категорияларында 71 беттеш өткөрүп, анын 62синде жеңишке жетишкен. 9 ирет жеңилүү ызасын тарткан. Ал эми Маккаринелли бул жолу 46-ирет рингге чыгып, 39-жеңишине жетишти.