Бишкекте "милиционерди өлтүргөн" деген шек менен изделип, ок атышууда жок кылынган 2 адамдын батирлеринен курал-жарактар табылды

10-декабрдан 11-декабрга караган түнү Бишкектин Чыгыш-5 кичи районунда УКМКнын атайын багыттагы жоокерлери менен ок атышуунун жыйынтыгында жок кылынган 2 адамдын батирлеринен курал-жарактар табылды. Бул тууралуу ИИМдин басма сөз кызматы билдирди.

Маалыматка ылайык, тергөө амалдарынын жүрүшүндө өлтүрүлгөндөрдүн бири Иманкул уулу Турат Нарын шаарында 1981-жылы туулган, буга чейин эки жолу соттолгон. Экинчиси Аширов Келдибек Жолдошевич 1986-жылы Баткен облусунун Кара-Бак айылында туулган, буга чейин соттолгон. Экөө тең "Жайшүл-Махди" кыймылынын мүчөлөрү экени болжолдонууда. Алар 19-ноябрда Бишкекте аймактык милиция кызматкери Актилек Абдубалиевди өлтүрүшкөнү аныкталды.

"Бул кылмышты иликтөөнүн жүрүшүндө кылмышкерлердин Бишкектеги жашаган жерлери аныкталган: бири Арча-Бешик конушунда, экинчиси Көк-Жарда турган. Батирлеринен Калашников автоматы, ок-дарылар, уюлдук телефондор, сим-карталар, флешкалар, бет каптар табылып, экспертизаларга жөнөтүлдү. Учурда тергөө иш-чаралары уланууда",- деп маалымдашты мекемеден.

Эске салсак, 10-декабрдан 11-декабрга караган түнү Бишкектин Чыгыш-5 кичи районунда террордук уюмдун 2 мүчөсү жок кылынган.