Ашкабактын ичине героинди жашырып Бишкекке алып келүүгө аракет жасаган адам колго түштү (фото)

Жалал-Абад облусунда ашкабактын ичине 1 килограмм 805 грамм героин жашырып Бишкекке алып келүүгө аракет жасаган адам колго түштү. Бул тууралуу бүгүн, 14-декабрда облустук милициянын басма сөз кызматы жарыялады.

Маалыматка ылайык, 12-декабрда саат 14:00 чамасында Бишкек – Ош унаа жолунун 568-чакырымында, Жалал-Абад облусунун Сузак районунун аймагында Жалал-Абад ОИИБинин Баңгизаттарын мыйзамсыз жүгүртүүгө каршы күрөшүү кызматы Сузак РИИБинин тергөө ыкчам тобу менен биргеликте Мерседес-Бенц үлгүсүндөгү автоунаасын токтоткон.

"Текшерген учурда токтотулган автоунаада Бишкек шаарынын 1952-жылкы В.К. аттуу тургуну жүргүнчү катары отурган. Анын 2 даана ашкабагынын ичине жашырылып салынган жалпы салмагы 1 килограмм 805 грамм героин табылган. Суракта ал героинди Бишкек шаарына алып бара жатканын жана буга чейин 6 жолду соттолгонун айтып берди",- дешти милициядан.

Аталган факт боюнча кылмыш иши козголуп тергөө амалдары жүргүзүлүүдө. Азыркы учурда кылмыш иши боюнча шектүүнүн кылмыштуу шериктерин аныктоо максатында ыкчам иликтөө иш-чаралары улантылууда.