Футбол боюнча Англиянын чемпиону "Челси" 9-ирет жеңилүү ызасын тартты, клуб байгелүү орундардан үмүт үздү

Өткөн сезондо футбол боюнча Англиянын Премьер-Лигасында чемпион аталган лондондук "Челси" футболдук клубу бул жылы кыйын мезгилди башынан өткөрүүдө. Клуб өлкө биринчилигинде 16 оюн өткөрүп, болгону 4 ирет жеңишке жетишкен. 3 оюн тең чыгуу менен аяктаса, 9 оюнда "көктөр" жеңилүү ызасын тартышкан.

"Челси" 15-декабрга караган түнү "Лестер" клубу менен беттеш өткөрүп, конокто 2:1 эсебинде жеңилди. Бул жеңиш менен "Лестер" мелдеш жадыбалында кайрадан 1-орунга көтөрүлдү.

Оюндан кийин "Челсинин" машыктыруучусу Жозе Моуринью комментарий берип, клуб быйылкы сезондо алдынкы төрттүккө кире албасын билдирди. Ошондо "Челси" кийинки жылы УЕФАнын Чемпиондор Лигасына катыша албай калат. "Өткөн сезондо мен оюнчуларды жаңы деңгээлге чыгарып, чемпиондукту багындыргам. Быйылкы сезондо менин шакирттерим жаңы деңгээлге чыга албай жатышат. Маселенин баары ушунда",- дейт Жозе.

Кошумчалай кетсек, Англияда чемпиондук үчүн күрөш 38 турдан турат. Азырынча 16 турдан кийин мелдеш жадыбалында "Лестер" 35 упай менен 1-орунда келүүдө. Кийин орундарда "Арсенал", "Манчестер Сити" жана "Манчестер Юнайтед" сыяктуу клубдар бар. "Челси" карамагындагы 15 упай менен 16-орунда келе жатат.