7 жашар Даниэлди мыкаачылык менен өлтүргөн аял 2 айга №1-СИЗОго отургузулду

Бишкекте 7 жашар Даниэлди мыкаачылык менен өлтүргөн аял 2 айга №1-СИЗОго отургузулду. Бул тууралуу SUPER.KG порталына шаардык милициядан билдиришти.

Маалым болгондой, тергөөчүлөр кылмышка шектүүнү суракка алышканда, ал күнөөнү өз моюнуна алып, кылмышты эч кимдин жардамысыз, жалгыз жасаганын айтып берди. "Башында бул факт боюнча "адам уурдоо" беренесинин негизинде кылмыш иши козголгон, андан соң "адам өлтүрүү" беренесине өзгөртүлгөн. Бул кылмыш ишинин алкагында тергөө иштери жүрүп жатат. Ага "опузалап акча талап кылуу" беренеси кошулушу мүмкүн",- дешти милициядан.

Эскерте кетсек, 10-декабрда милицияга 33 жаштагы Астра аттуу жаран кайрылып, анын баласын белгисиз адамдар уурдап, кайтарып берүү үчүн 150 миң сом талап кылып жатышканын айткан.

Ыкчам иликтөө амалдарынын жүрүшүндө 10-декабрда саат 10:00дө 7 жашар Даниэль үйүнөн чыгып, мектепке жетпей дайынсыз жоголгону аныкталган. Ошол эле күнү саат 15:19да баланын апасынын телефонуна: "Акмак, сенин ханзаадаң менин жанымда. Тирүү бойдон кайтарып алгың келсе, 150 000 сом даярда. Эч кимге айтпа. Айтсаң кызыңды да жоготосуң. Эч ким жардам бербейт. Эртең 7де акчаңды даярда, кайра чалам!" деген смс-кат келген (смс-кат орус тилинен которулду -SUPER.KG).

11-декабрда аталган кылмышка шектүү катары 39 жаштагы А.Майрам аттуу аял кармалган. Анын Жалал-Абад облусунда туулганы жана буга чейин уурдоо жана алдамчылык боюнча соттолгону аныкталган. Суракта А.Майрам акыркы 10 күн ичинде уурдалган баланын үй-бүлөсү жөнүндө маалыматтарды топтоп жүргөнүн айткан. Окуя болгон күнү ал баланы алдоо жолу менен Сокулук районунун Күн-Туу айылына алып барып, суусундугуна димедрол (уктатуучу дары) кошуп уктатып койгонун айткан. Аталган дары өтө көп кошулгандыктан бала каза болуп калган. Ошондо аял баланын жансыз денесин талаадагы чуңкурга таштап салган. Андан кийин ал баланын апасына үстүдөгү смс-катты жөнөткөн.

Баланын денесин кароодо айрым жерлеринен көк алалар жана моюнунан жиптин изи байкалган.