Базар-Коргондо үйдө даярдалган туздалган бадыраңдан ууланган үй-бүлөнүн дагы бир мүчөсү каза болду

Базар-Коргондо үйдө даярдалган туздалган бадыраңдан ууланган үй-бүлөнүн дагы бир мүчөсү каза болду. Бул тууралуу бүгүн, 21-декабрда SUPER.KG порталына Базар-Коргон райондук ооруканасынын башкы дарыгери Замир Мырзабеков билдирди. Анын айтымында, 10 жаштагы Айдар Сманбеков жандандыруу бөлүмүндө жатып өзүнө келбей 18-декабрда каза болду.

“Консерваланган бадыраңдан ууланган үй-бүлөнүн апасынын жана дагы эки кызынын абалдары канааттандырарлык. Алар палатага которулушту, буюрса, 3-4 күндө үйлөрүнө чыгарылышат”,- деди дарыгер.

Эскерте кетсек, 8-декабрда аял 4 баласы менен Жалал-Абад облусунун Базар-Коргон аймактык ооруканасына жеткирилген. Алардын консерваланган тамак-аштан улам ууланганы аныкталган. Кийинки күнү аялдын 14 жаштагы улуу кызы Диана Уланбек кызы каза болгон. Ал эми 10 жаштагы иниси оорукананын жандандыруу бөлүмүнө жаткырылган эле.