"Сакал" деген каймана ат менен белгилүү, эл аралык издөөдө жүргөн уюшкан кылмыштуу топтун мүчөсү кармалып, тергөө абагына киргизилди

"Сакал" деген каймана ат менен белгилүү болуп, Эл аралык издөөдө жүргөн уюшкан кылмыштуу топтун мүчөсү Улан Токтосунов кармалды. Бул тууралуу ИИМдин басма сөз кызматы 21-декабрда билдирди.

Маалыматка караганда, 19-декабрда саат 04:30 чамасында Стамбул-Бишкек каттамы менен кыргыз жерине учуп келген У.Токтосунов кармалган. Учурда тергөө абагына киргизилип, иликтөө иштери жүрүүдө. Ал уюшкан кылмыштуу топтун мүчөсү катары Ички иштер министрлигине каттоого алынган.

Улан Токтосунов 1978-жылы Талас облусунда туулган. Спорттук мектепти аяктаган, Кара-Балта шаарында жашап келген. "Бейбаштык", "өз балдарын камсыздоодон баш тартуу", "соттун чечимин аткарбоо" беренелери менен кылмыш жоопкерчилигине тартылган. 2015-жылдын май айынан тартып "Дамке аттуу уюшкан кылмыштуу топтун мүчөсүн өлтүрдү" деген шек менен ага эл аралык издөө жарыяланган.