Украинада жолбун ит 20 жаштагы кызды жылытып, өлүмдөн сактады

Украинада жолбун ит 20 жаштагы кызды өлүмдөн сактады. Бул тууралуу орус басылмаларынын бири бүгүн, 22-декабрда жарыялады. Маалыматка караганда, Полтава шаарында айдоочу окуусуна бара жаткан студент кызды унаасы менен сүзүп, анан өлгөн экен деп, кылмыштын бетин жашыруу үчүн аны шаар четине таштап кете берген.

Бул ишти иликтеп жаткан укук коргоо органдарынын айтымында, өмүр менен өлүмдүн ортосунда жаткан кызга жолбун ит келип, үстүнө жатып жылыткан.

"Качан тийиштүү кызматтар жардамга келгенде, студент кыз тирүү экени белгилүү болгон. 20 жаштагы кыздын учурдагы абалы туурасында маалымат айтылган эмес. Бирок ал оор жаракаттарды алганы маалым. Бүгүнкү күндө Украинанын укук коргоо органдары жол кырсыгына себепкер болгон айдоочуну издөөдө”,- деп айтылат маалыматта.