Бишкекте жана Ошто уюлдук телефондорду "уктаткандар" кармалышты

Бишкек жана Ош шаарларында коркутуу жолу менен уюлдук телефондорду алып качып кеткендер кармалышты. Бул тууралуу ИИМдин басма сөз кызматы билдирди.

Маалыматка ылайык, 21-декабрда Бишкек шаарынын тургуну милицияга арызданып, 20-декабрда саат 20:15 чамасында белгисиз адам анын уюлдук телефонун жулуп качып кеткенин айткан. "Арыздын негизинде ыкчам иш-аракеттерди жүргүзүүнүн натыйжасында кылмыштын изи сууй электе Октябрь райондук милициясынын кылмыш иликтөө бөлүмүнүн кызматкерлери Бишкек шаарынын Т.У. аттуу тургунун кармашкан. Бул факт боюнча тергөө амалдары башталды",- деп билдирет мекеме.

"21-декабрда Кадамжай районуна караштуу Айдаркен шаарынын тургуну жергиликтүү милицияга кайрылган. Анын айтымында, 12-декабрда саат 22:00 чамасында Нариман орто мектебинин жанында белгисиз адам күч колдонуп уюлдук телефонун тартып алган. Арыздын негизинде ыкчам иликтөө иштери жүргүзүлүп, Ош шаардык ички иштер башкармалыгынын кылмыш иликтөө бөлүмүнүн кызматкерлери тарабынан Ош шаарынын 21 жаштагы О.С. аттуу тургуну кармалган. Бул окуя боюнча тергөө амалдары жүрүүдө",- деп айтылат маалыматта.