Жалал-Абад. "Ошто жөнөкөй жаранды аткылап өлтүргөн" деп террорчулукка шектелген 3 адамды СОБР операциянын жүрүшүндө кармады (фото)

Бүгүн, 24-декабрда Жалал-Абад шаарында тез чара көрүү атайын отрядынын (СОБР) жоокерлери Ош ШИИБинин кызматкерлери менен биргеликте жүргүзүлгөн кармоо операциясынын жүрүшүндө 3 адамды колго түшүрүштү. Бул тууралуу SUPER.KG порталына Жалал-Абад ОИИБинен билдиришти.

Маалыматка ылайык, операция шаардын Н.Айтматова көчөсүндөгү көп кабаттуу үйлөрдүн биринде саат 11:30 чамасында орун алган. "Кан төгүү болгон жок. Жоокерлер 3 адамды кармашты. Кылмышка шектүүлөр турган батирден 2 курал, ок-дарылар, 4-5 бет кап, диний китептер жана баңгизаттар табылды. Кармалгандар болжол менен 25-26 жашта. Алардын экөө Өзбекстандын жарандары, үчүнчүсү Кыргыз Республикасынын жараны. Үчөөнү тең милиция кызматкерлери Ош шаарына алып кетишти. Алар 22-декабрда "Ош облусунун Кара-Суу районунда жергиликтүү тургунду аткылап салышкан" деп шектелип жатышат",- дешти милициядан.

Эскерте кетсек, 22-декабрда саат 22:30 чамасында Ош облусунун Кара-Суу районундагы Кашкар-Кыштак айылынын 1978-жылкы тургуну Юнусжан Абдужалиловду белгисиз адамдар сыртка чакырып, аткылап, андан соң белгисиз жакка качып кетишкен.