Чүйдө жолдошу камакка алынгандан кийин аялы төрт баласын, анын ичинде эки айлык кызын таштап кетип калган

Чүй облусуна караштуу Аламүдүн районунда энеси төрт баласын таштап кеткени тууралуу Жашы жете электердин иши боюнча инспекциянын кызматкерлери жүргүзгөн рейдде белгилүү болду.

Кызматкерлер барган үйдө 62 жаштагы карыя 2 айлык жана 4 жашар кызды, 2 жана 6 жаштагы уулдарды карап келгени аныкталган. Маалыматка караганда, балдардын атасы А.Эдил декабрь айынын башында маңзат сактоого шектелип СИЗОго камакка алынган. Апасы А.Замира балдарын таштап кетип калган (туугандарынын айтымында, учурда ал Жалал-Абад облусунун Токтогул районунда турат).

Социалдык кызматкерлерден балдарды алып кетпешин суранып көзүнө жаш алган чоң атасы А.Жапын ушул убакка чейин балдарды жалгыз карап келген. Иликтөөнүн жүрүшүндө балдардын апасы буга чейин паспорт албагандыгы белгилүү болгон. Учурда 2 жаштагы уулу жана 2 айлык кызы Токмоктогу балдар үйүнө жайгаштырылды. Ал эми 4 жаштагы кызы менен 6 жаштагы уулу Бишкектеги кароосуз калган балдар үйүнө алынып келинди. Муну 24-декабрда Социалдык өнүгүү министрлигинин басма сөз кызматы билдирди.