Каракол шаарында 10 жаштагы кызды өлтүрүүгө шектелип жездеси камакка алынды

Каракол шаарында 10 жаштагы кызды өлтүрүүгө шектелип жездеси камакка алынды. Бул тууралуу бүгүн, 25-декабрда SUPER.KG порталына Ысык-Көл облустук ички иштер башкармалыгынын басма сөз кызматынын жетекчиси Сталбек Усубакунов билдирди. Анын айтымында, каза болгон кыздын жездеси кылмышка атасынан өч алуу үчүн барган.

“Кечээ, 24-декабрда саат 16:30да укук коргоо органдарына өлтүрүлгөн кыздын атасы телефон чалган. Ал үйүнө жумуштан келип, 2005-жылкы кызынын жана 2007-жылкы баласынын жарадар болуп жатканын көргөн. Кийин кыз жан берген. Ал эми анын бир тууган иниси оор абалда жандандыруу бөлүмүнө жаткырылган”,- деди Усубакунов.

Милицияга белгилүү болгондой, окуя 24-декабрда саат 11:00 чамасында болгон. Жусуп аттуу 1963-жылкы балдардын жездеси үйдө балдар жалгыз калганын билип келген. “Биринчи ал 8 жаштагы баланы балтанын башы менен чапкан. Башына тийген катуу соккудан жашы жете элек өспүрүм эс-учун жоготкондо, жездеси 10 жаштагы кызды ошол эле балта менен бир нече ирет чапкан. Алган жаракатынан секелек кыз жан бергени белгилүү болду.

Ал эми үйгө жездеси келип, аларга кол салганын 8 жаштагы бала эсине келгенде айтып берди. Учурда Жусуп аттуу адам кармалып, ал кылган ишин мойнуна алды. Шектүү Каракол шаардык убактылуу кармоочу жайына киргизилди. Бул факт боюнча кылмыш иши 97-берене (адам өлтүрүү) менен козголду”,-деди басма сөз кызматынын жетекчиси.