Пеле: "Азыр Лионель Мессиге тең футболчу жок, кезинде мени Беккенбауэр, Сократес менен салыштырышчу"

Легендарлуу бразилиялык футболчу Пеле кайрадан дүйнөнүн мыкты футболчуларынын бири Лионель Месси тууралуу үн катты. "Мен Лионель Мессинин акыркы 10 жылдагы мыкты футболчу экенин айтып эле келем. Азыр Мессиге тең футболчу жок, бул доордо аны эч ким менен салыштыра албайсың. Мен ойноп жүргөн кезде өтө күчтүү футболчулар бар болчу. Анда мени Беккенбауэр, Сократес жана Дирсеу Лопес сыяктуу футболчулар менен салыштырышчу",- дейт Пеле.

Чет элдик маалымат булактары кабарлагандай, Пеле бир доордо күчтүү футболчулар топ-тобу менен келип, бир доордо мыкты футболчулар аз болгонун айткысы келген. "80-жылдары Марадона дүйнөдөгү мыкты футболчу болчу. Ал доордо ага тең ойногон футболчулар болгон жок. Азыр ошондой көрүнүш байкалып жатат. Месси топту баш менен сүзүүдө жана оң бут менен тебүүдө алсыз болгону менен, башка футболчулардан кыйла жогору турат",- деп кошумчалайт 3 жолку Дүйнө чемпиону.