Өмүрбек Текебаев: "Исхак Раззаковдун өмүр жолу - эмгек менен зор ийгиликтерге жетүүнүн бийик үлгүсү"

Бүгүн, 25-декабрда Бишкекте Исхак Раззаковдун мемориалдык үй-музейинде Жогорку Кеңештеги "Ата Мекен" фракциясынын депутаттарынын демилгеси менен муктаж жана жетим балдар үчүн жаңы жылдык балаты уюштурулду. Балдар алгач улуу инсандын өмүр таржымалы, жашаган үйү менен таанышып, андан кийин Аяз ата жана Аяз кыздын катышуусундагы жаңы жылдык балаты майрамын депутаттар менен биргеликте шаңга бөлөштү. Жаңы жылдык балатынын аягында балдар Аяз атанын, депутат жана келген коноктордун колунан жаңы жылдык белектерин алышып, алар менен эстеликке сүрөткө түшүп, үйлөрүнө кубанычтуу тарашты.

Мемориалдык үй-музейдин директору Арман Момоханова белгилегендей, Исхак Раззакович ата-энесинен эрте ажырап, балдар үйүндө чоңойгондуктан, муктаж жана балдар үйлөрүнүн тарбиялануучуларына абдан аяр жана жылуу мамиле жасаган. Ошондуктан ал Кыргызстан компартиясынын 1-катчысы болуп турганда ар жылы 25-декабрда өз үйүндө балдар үчүн жаңы жылдык балаты орнотуп, оюндарды уюштуруп жана өз колу менен белектерди тапшырууну салтка айландырган. "Исхак Раззакович баштаган бул салтты Өмүрбек Чиркешович лидерлик кылган ЖКнын "Ата Мекен" фракциясынын улантып жатканы бизди кубантат. Депутаттарыбызды Исхак Раззаковичтин арбагы колдосун",- деди директор сөзүнүн аягында.

Мындай салтты "Ата Мекен" фракциясынын депутаттары ушул жылдан баштап улантууну колго алышты. Бүгүнкү балаты майрамына келгендерди куттуктап жатып "Ата Мекен" фракциясынын лидери Өмүрбек Текебаев буларга токтолду: "Урматтуу балдар! Кыргыз элинин чыгаан мамлекеттик ишмери Исхак Раззаков ата-энесинен эрте ажырап, балдар үйүндө өсүп-чоңойгон. Ага карабастан, ал киши зор ийгиликтерге жетишип, өлкөбүздүн биринчи адамы болгон. Исхак Раззаковдун өмүр жолу - эмгек менен зор ийгиликтерге жетүүнүн бийик үлгүсү".

Майрамдык балатынын жүрүшүндө Исхак Раззаков баштаган бул салт жыл сайын 25-декабрда өткөрүлүп турары белгиленип, улуу инсандын мемориалдык үй-музейин жакшыртуу маселелери да депутаттар музей менен таанышып жатканда айтылды.