26-декабрга караган түнү өлкөнүн түштүгүндө жер титирөө катталды

26-декабрга караган түнү саат 01:17 чамасында өлкөнүн түштүк аймагында жер титирөө катталды. Бул тууралуу SUPER.KG порталына окурмандар билдиришти.

Жер титирөө Ош, Баткен жана Жалал-Абад облустарында сезилген. Болжол менен күчү 3-3,5 баллга жетти. Алдын ала маалыматтар боюнча, кыйроолор жана жабыркагандар жок.

КРнын Сейсмология институту берген маалыматка караганда, жер титирөөнүн очогу Ооганстанда жайгашкан. Эпицентрде күчү 6,2 баллга жеткен жер силкинүү кыргыз жеринен сырткары Тажикстан, Казакстан жана Пакистанда да сезилди. Дүйшөмбү шаарында жашоочулар сыртка чыккандан кийин да бир топ убакыт өтүп, жер силкинүү дээрлик 5 мүнөткө созулганы айтылды. Пакистанда 3 адам каза болсо, жабыркагандардын саны 90дон ашты.