Ошто эки күн бою муздак суудан изделип жаткан 5 жашар баланын сөөгү табылды

Ош шаарында суудан изделип жаткан баланын сөөгү табылды. Бул тууралуу Өзгөчө кырдаалдар министрлигинин басма сөз кызматы жарыялады.

Маалыматка ылайык, 27-декабрда саат 18:00 чамасында Ош шаарынын Көкүмбий көчөсүндө жайгашкан балык базасында жаш балдардын сууга чөгүп кетишкени боюнча маалымат түшкөн. Беш адамдан турган Куткаруу кызматынын куткаруучулары аталган дарекке ыкчам аракетте саат 18:22де жетип барышкан.

"Издөө иштеринин жүрүшүндө 7 жашар Баястандын жансыз денесин анын атасы Эмил Төрөбаев суудан алып чыккан. Ал эми Баястандын 5 жашар иниси Маратты куткаруучулар болжол менен туурасы 80-90 метр, узундугу 150-160 метр, тереңдиги 1,5-2,5 метр болгон балык базасындагы суудан издөө-куткаруу иштерин жүргүзүшүп, баланын табылбагандыгына байланыштуу жардамга кошумча Республикалык өзүнчө куткаруу отрядынан куткаруучулар жөнөтүлгөн",- деп билдирет мекеме.

"Дайынсыз болуп жаткан жаш баланы суудан издөө-куткаруу иштери саат 22:40ка чейин жүргүзүлүп, караңгы болгондуктан, убактылуу токтотулган. Куткаруучулар издөө иштерин 28-декабрда эртең менен саат 08:00дө кайра улантышкан. Натыйжада саат 10:25те куткаруучулар 5 жашар Мараттын жансыз денесин табышып, атасына жана жакын туугандарына өткөрүп беришти",- деп айтылат маалыматта.