Борбор калаада мас абалында курбусун өлтүрүүгө шектелип 22 жаштагы кыз кармалды

Бишкек шаарында мас абалдагы жаш кыздын бычактан улам каза тапкандыгы боюнча иликтөө иштери жүрүүдө. Бул тууралуу бүгүн, 29-декабрда Бишкек шаардык ички иштер башкармалыгынан билдиришти.

Маалыматка ылайык, 26-декабрда эртең менен жандандыруу бөлүмүнө бычактан жаракат алган 23 жаштагы С..Ж. аттуу кыз алынып келинген. Көп өтпөй ал өзүнө келбей жатып ооруканадан каза болгон. Иликтөө иштеринин натыйжасында каза тапкан кыз батирде 42 жаштагы адам жана 22 жаштагы К.Гүлзада аттуу курбусу менен бирге алкоголдук ичимдиктерди ичип отурганда ортодо түшүнбөстүктөр чыгып, урушуп кетишкени белгилүү болгон.

42 жаштагы жаран эшикке чыгып келгенден кийин К.Гүлзада курбусун бычактап салганын айткан. Кылмышка шектүү кыз камакка алынып, учурда бул окуя боюнча иликтөө иштери жүрүүдө.