Чүй облусунун эки буту баспай калган тургуну Порше унаасын кол менен башкарууга ылайыкташтырып чыкты (фото)

Чүй облусуна караштуу Байтик айылынын эки буту баспай калган Камил Гайдаров аттуу тургуну Порше унаасын кол менен башкарууга ылайыкташтырып чыкты. "Үйдө терек кыйып жатып жерге кулап түшкөм. Ошондо белим сынып, жүлүнүм кысылып калыптыр. Арадан 3,5 жыл өттү, эки бутум иштебей, ден соолугунун мүмкүнчүлүгү чектелгендердин арабасында отурам",- деген Гайдаров Порше унаасын (газ, тормозду) кол менен басууга ылайыкташтырганын SUPER.KG порталына айтып берди.
"Бул унааны алганыма бир жыл болду. Токмокто бир үйдө турган жеринен 13 миң сомго сатып алып, өзүмө ыңгайлуу кылып кураштырып чыктым. Ичинин баарын булгаары менен каптадым. Унаа 1978-жылы чыгарылганы менен, анча-мынча унааларга караганда жакшы, жылуу. Көлөмү 350 м³ (объём цилиндра 350 м³), жүзүнө 6 литр май сарпталат",- дейт Камил Гайдаров.