Кийик атып, аны менен сүрөткө түшкөн Экологиялык жана техникалык коопсуздук инспекциясынын кызматкери жоопко тартылбайт

Кийик атып, аны менен сүрөткө түшкөн Экологиялык жана техникалык коопсуздук инспекциясынын кызматкери Искендер Жолдошов эч кандай жоопко тартылбайт. Муну бүгүн, 29-декабрда SUPER.KG порталына аталган мекеменин басма сөз катчысы Анарбек Абазбеков билдирди. Анын айтымында, 3 адамдан түзүлгөн комиссия бул боюнча кызматтык иликтөө жүргүзүп, аңчылык мыйзамдуу экенин аныктап чыкты.

“Экологиялык жана техникалык коопсуздук инспекциясынын Укук башкармалыгынын адиси Нуржан Казакбаев, Экологиялык коопсуздук боюнча башкармалыктын инспектору Талант Карагулов жана кадрлар боюнча иш алып барган кызматкер Нестан Токтобаева аталган комиссиянын курамына киришкен. Иликтөө ишинин жүрүшүндө Мергенчилер жана балыкчылар коомунун союзуна “Искендер Жолдошов аталган биримдикке мүчөбү?” жана Айлана-чөйрөнү коргоо боюнча мамлекеттик агенттигине “Аңчылык кылууга уруксат кагазы чынында эле берилгенби?” деп суроо жөнөтүлгөн. Жыйынтыгында баары мыйзамдуу түрдө экени аныкталып, Жолдошовго карата административдик жана айып пул жоопкерчилиги каралган жок”,- деди Абазбеков.

Ошондой эле SUPER.KG порталына Башкы прокуратурадан билдиришкендей, кийиктерди атып, алар менен сүрөткө түшкөн Кадамжай районунун прокурорунун орун басары Алтынбек Акимбаев боюнча иликтөө иштери уланып жатат. Комиссия өз жыйынтыгын январь айынын башында чыгарат.

Эскерте кетсек, окурман 14-декабрда SUPER.KG порталына WhatsApp аркылуу мамлекеттик органдын кызматкери тоо текелерди атып, жаратылышка зыян келтирип жатканын билдирген эле. Окурман "Чара көрүлөбү же чиновниктерге боло береби?" деп суроо койгон.