2015-жылы дүйнө боюнча иш учурунда 69 журналист каза болгон

2015-жылы дүйнө боюнча жумуш учурунда 69 журналист каза болгон. Бул тууралуу чет элдик басылмалар жазып чыгышты.

"Чеги жок кабарчылар" Эл аралык уюмунун маалыматына ылайык, курман болгон журналисттердин көбү куралдуу жаңжал болбогон өлкөлөрдө өлтүрүлгөн, ошондой эле 43 журналисттин кандай кырдаалда каза болгондугу белгисиз.

Баяндамалардын авторлору Сирия жана Иракты журналисттер үчүн кооптуу мамлекеттер деп аташты. Иш учурунда Сирияда 10, Иракта 11 ММКлардын кызматкери өлтүрүлгөн.

Нью-Йорктогу Журналисттерди коргоо комитетинин маалыматы боюнча, 2015-жылы 29 журналист террористтердин колунан өлгөн. Алардын арасында Мухаммед пайгамбарды мазактап, карикатурасын жарыялаган Париждеги "Charlie Hebdo" сатиралык журналына кол салганда өлтүрүлгөн 8 журналист бар.

Эскерте кетсек, кечээ, 29-декабрда кечинде Бишкекте жол кырсыгынан оператор каза болду.