Аялдар колониясы Жаңы жылды карнавал жана дискотека менен тосту

№2-аялдар колониясында жаңы жылдык карнавал өттү. Бул тууралуу Жаза аткаруу кызматынын басма сөз кызматы билдирди.

Маалыматка ылайык, иш-чарада соттолгон аялдарга арналган куттуктоо сөздөрүн мекеменин башчысы Т.Ыймашев, Кызыл Крест Эл аралык комитетинин өкүлдөрү айтышты. Колонияда отурган 10 аялга башчынын буйругу менен баалуу белектер ыйгарылды, 19 аялга 200 сомдон 600 сомго чейин акчалай сыйлык берилди жана 111 аялга ыраазычылык жарыяланды. 17 аялга кошумча узак мөөнөттүк, 27 аялга кыска мөөнөттүк жолугушуу өткөрүүгө мүмкүнчүлүк берилди. Мындан тышкары ар бир бөлүмгө белек катары идиш-аяктар тапшырылды. Мекеменин жашоосуна активдүү катышкан 50 соттолгон аялга жеке белектер берилди. Майрамдык иш-чаранын алкагында концерт өткөрүлүп, ага "Музаман" эстрада тобу катышты. Карнавал дискотека менен аяктады.