Исламдагы шиит агымынын аалымы Нимра ан-Нимранын өлүм жазасына тартылышы мусулман өлкөлөрүндө массалык нааразылык жаратты

Сауд Арабияда "терроризмге катыштыгы бар" деп айыпталган 47 адам өлүм жазасына тартылды. Бул тууралуу чет өлкөлүк басылмалар жазып чыгышты.

Расмий маалыматка караганда, аларга "экстремисттик идеологияны колдогон, террордук уюмдарга тиешеси бар" деген айып тагылып, баары күнөөлүү деп табылышкан. Көпчүлүгүнүн 2003-2006-жылдары "Аль-Каида" уюму тарабынан жасалган террордук акттарга катыштыгы бардыгы айтылган. Өлүм жазасына тартылгандардын арасында исламдагы шиит агымынын аалымы Нимра ан-Нимра да бар. Анын өлтүрүлүшүн Иран бийлиги кескин сындап, бир катар мусулман өлкөлөрүндө массалык нааразычылыктарды жаратты.

3-январга караган түнү ирандыктар Сауд Арабиянын Тегеренда жайгашкан элчилигине чабуул коюшкан. Алар эмеректерди сындырып, имаратты өрттөөгө аракет кылышкан. Мындан сырткары Мешхед шаарындагы консулдукка дагы чабуул жасалган. Массалык нааразычылыктардан кийин Сауд Арабия Иран менен дипломатиялык кызматташтыгын жокко чыгарарын жарыялады.