"ЭЛДИК КАБАРга" жооп: МАИ кызматы “Өзгөндө улак тартыш оюну өтүп, андан Ош - Бишкек трассасында унаа тыгыны бир нече саатка эмес, 5 мүнөткө гана пайда болду” деди

"Өзгөн районунда улак тартыш оюну өтүп, мындан улам Ош - Бишкек трассасында унаа тыгыны бир нече саатка эмес, 5 мүнөткө гана пайда болду". Муну бүгүн, 4-январда SUPER.KG порталына Жол-кайгуул кызматынын Ош шаардык жана Ош облустук башкы башкармалыгынын басма сөз катчысы Кубаныч Камчыбеков билдирди. Анын айтымында, Өзгөн районунда өткөн улак тартышта коомдук тартипти күч органдары көзөмөлгө алышкан.

“Өзгөн районунун МАИ кызматкерлери улак тартыш болгон жерде унаа тыгындарын болтурбоо үчүн толук курамында жолду көзөмөлгө алышты. Оюн Бишкек – Ош трассасына жакын болгон жок, ага карабай айдоочулар унааларын жай айдап, улак тартышты көргөнгө аракет кылышты. Мындан улам 1 чакырымга жетпеген 5 мүнөттүк тыгындар пайда болду. Ошондой эле жолдо ыңгайсыздыкты спорттук оюнду көрүүгө келгендер унааларын жолго туура эмес токтотуп коюп пайда кылышты”,- деди Камчыбеков.

Эскерте кетсек, 3-январда окурман SUPER.KG порталына WhatsApp аркылуу Өзгөндө өткөн улак тартыштын айынан 28 чакырымга созулган унаа тыгыны пайда болгонун маалымдаган эле.