УКМК Бишкек-Ош трассасындагы жол тыгыны боюнча материалдар менен таанышууда

Улуттук коопсуздук мамлекеттик комитети 3-январда Бишкек-Ош унаа жолундагы көп чакырымга созулган тыгын фактысы боюнча материалдар менен таанышып жатканын аталган мекеменин маалымат кызматы 5-январда билдирди.

Маалым болгондой, азыркы маалда бул инцидент боюнча спорттук ат оюндарынын уюштуруучуларына карата жана стратегиялык унаа жолдун үзгүлтүксүз иштешин камсыздоосуна жооптуу кызматкерлерге карата текшерүү иш-чаралары жүргүзүлүп жатат. Материалдар текшерилгенден кийин тиешелүү жыйынтыктар прокуратура органдарына берилет.

Эскерте кетсек, 3-январда окурман SUPER.KG порталына WhatsApp аркылуу Өзгөндө өткөн улак тартыштын айынан 28 чакырымга созулган унаа тыгыны пайда болгонун маалымдаган эле.

Ал эми 4-январда SUPER.KG'ге Ош шаардык жана Ош облустук жол-кайгуул кызматынын басма сөз катчысы Кубаныч Камчыбеков "унаа тыгыны бир нече саатка созулду деген жалган, 5 эле мүнөт болду" деп билдирген. Көп өтпөй жаңылыш маалымат бергенин моюнга алып, тыгын бир нече саатка созулганын тастыктады.