Ошто дарыгер "жол кырсыгынан каза болгондорго "ашказан жарасынан өлдү" деген диагноз койгон" деп шектелүүдө

Ош облусунда дарыгер "маркумдун өлгөндүгүнүн себебин аныктоочу жыйынтыкты атайылап туура эмес чыгарган" деп шектелүүдө. Бул тууралуу бүгүн, 5-январда Ички иштер министрлигинен билдиришти.

Маалыматка караганда, 2014-жылдын 30-декабрында Ош-Бишкек унаа жолунун 643-чакырымында жол кырсыгы катталган. Анда Тойота Раум үлгүсүндөгү унаанын айдоочусу рулду башкара албай жол боюндагы Вольво үлгүсүндөгү унааны сүзүп, натыйжада Тойота Раумдун 23 жаштагы айдоочусу жана 22 жаштагы жүргүнчүсү окуя болгон жерден каза болушкан.

Алардын сөөктөрү облустук клиникалык ооруканага алынып келгенде дарыгер аларга эч кандай экспертиза жүргүзбөй, эмне себептен өлгөндүгүн жазбай, өлгөндүгү тууралуу күбөлүктөрүнө "бронхиттин илешме чел кабыктарынын оорусу, пневмониянын оор түрү" жана "курч мүнөздөгү ашказан жарасы" деген диагноздорду жазып койгон. Учурда бул факт боюнча тергөө амалдары жүрүүдө.