Сириядагы согуштук аракеттерге катышып, террордук топ түзгөн жаран кыргыз жерине атайын тапшырма менен кайтканын билдирди

Сириядагы согуштук аракеттерге катышып, кыргыз жеринде 16 кишиден террордук топ түзгөн Гиесдин Жамолдинов өлкөбүзгө атайын тапшырма менен кайтып келгенин жергиликтүү телеканалдардын бирине айтып берди.

Жалал-Абад облусунун 26 жаштагы тургуну Г.Жамолдинов Сириядагы согуштук аракеттерге катышып, ал жактан психологиялык катуу даярдыктан өтүп келгендиги белгилүү болду. Анын айтымында, ал эл аралык террордук уюмдарда Абдусалах деген каймана аты бар адамдын атайын тапшырмасы менен кайтып келген. Көздөгөн максатына жетүү жана тапшырмаларды аткаруу үчүн ага ири суммадагы акча каражаты жана курал-жарактар да берилген.

"Биздин топтун негизги максаты кыргыз жеринен Сириядагы согуштук аракеттерге кетүүгө тоскоолдук жараткан "ахмадичилерди" жок кылуу болчу. Алар бизге бир топ тоскоолдуктарды жаратышууда",- дейт Г.Жамолдинов.

2015-жылдын 24-декабрында кармалган террордук топтун 16 мүчөсү азыркы тапта соттун чечимин күтүүдө.

Эскерте кетсек, буга чейин кыргыз жеринен Сириядагы согуштук аракеттерге кетүүгө тоскоолдук кылган жаранды аткылап кетишкен. 22-декабрда саат 22:30 чамасында Кара-Суу районундагы Кашкар-Кыштак айылынын тургуну Ю.Абдужалиловду белгисиз адамдар сыртка чакырып, аткылап, андан соң белгисиз жакка качып кетишкен.