"Алтын топ" сыйлыгы үчүн жарышта футболчу Мессинин башкы атаандашы Роналду эмес, Неймар болмокчу (инфографика)

11-январда Швейцариянын Цюрих шаарында футбол жаатында 2015-жылдагы мыктылар аныкталып, аларга сыйлык тапшырылат. Бул күнү эң беделдүү сыйлыктардын бири, дүйнөнүн мыкты футболчусуна тапшырылуучу "Алтын топ" сыйлыгынын ээси аныкталат.

Өткөн жылы бул сыйлыкты португалиялык футболчу Криштиану Роналду алган. Бул ирет аталган сыйлыкка "Барселонанын" чабуулчулары Лионель Месси менен Неймар, жана "Реалдын" чабуулчусу Криштиану Роналду талапкер болууда. Биз "сыйлыкты Лионель Месси алышы керек" деген пикирди карманып, муну далилдөөгө аракет кылабыз.

Месси өткөн жылы карьерасындагы эң мыкты оюнун көрсөттү. Көзү ачылган, мол тажрыйбага ээ футболчу "Барселона" кемесин жеңиш аралына сүйрөп жеткирди. Жолунан чыккан "Реал", "Атлетико", "Бавария", "Ювентус" сыяктуу мыкты клубдар "Барсанын" алдында тизе бүккөнгө мажбур болушту. Быйыл Месси сыйлык тапшырылуучу залга киргенде көпчүлүк ордунан туруп, боорун топчулай турганы анык. Демек, Мессиге бул сыйлык 5-ирет тапшырылат. 5 ирет "Дүйнөнүн мыкты футболчусу" аталган соң Месси кийинки оюндарга өзүн кантип шыктандырат? Бул келечектин суроосу. Азырынча ал сыйлык тапшырылчу мезгилди күтүп, эл алдында сүйлөй турган сөзүн даярдап гана турганы оң.

Месси жаракат алганда Неймар өзүнүн мыктылыгын, лидерлик сапатын көрсөтүп, командага бир топ ийгилик алып келди. Бирок Месси майданга чыкканда Неймар өзүнө көп жоопкерчилик ала албасы бышык. Ошентсе да бразилиялык футболчу Месси уткан бардык чемпиондукту багындырды, бирок сыйлык бул ирет Неймарга тапшырылат деп ишендирип айтуу мүмкүн эмес. Себеби бул сыйлыкты тарыхта лидердин көлөкөсүндө жүргөн бир дагы футболчу алып көргөн эмес.

Криштиану Роналду 30 жашка чыкты. Бул жашка чыкканда футболчу жетиштүү деңгээлде тажрыйбалуу болуп калат. Бирок мол тажрыйбага катар жаракаттардын да саны ашат. Роналду 2015-жылы Месси менен Неймарга караганда көбүрөөк гол киргизди. Ошентсе да "Реалдын" жыл ичинде бир дагы мелдеште чемпион боло албаганы Роналдуну сыйлыктан алыстатып коюшу турган кеп. Анын деңгээли атаандаштарынан төмөн деп айтканыбыз жок, болгону сыйлыкты алуу үчүн сөзсүз түрдө бетке кармай турган командалык ийгилик болуш керек.