Кылмыштуу чөйрөнүн көрүнүктүү өкүлү Улан Токтосунов (Сакал) Нарындагы СИЗОго дагы бир айга калтырылды

Жакында аэропорттон кармалган кылмыштуу чөйрөнүн көрүнүктүү өкүлү Улан Токтосунов (лакап аты Сакал) Нарындагы №24-СИЗОго которулган эле. Бүгүн анын иши боюнча соттук отурум болуп, соттун чечими менен ал дагы бир айга аталган СИЗОго калтырылды.

Мамлекеттик айыптоочу У.Токтосуновду тергөө амалдары аяктагыча 1 айга (14-февралга чейин) №24-СИЗОдо калтырууну өтүндү. Ишти карап жаткан судья Эмил Кайыпов сунушту колдоого алды. Соттук териштирүү жабык режимде өттү.

Эскерте кетсек, Улан Токтосунов 2015-жылдын 19-декабрында саат 04:30 чамасында Стамбул-Бишкек каттамы менен кыргыз жерине учуп келгенде кармалган. Ал уюшкан кылмыштуу топтун мүчөсү катары Ички иштер министрлигине каттоого алынган.

Улан Токтосунов 1978-жылы Талас облусунда туулган. Спорттук мектепти аяктаган, Кара-Балта шаарында жашап келген. "Бейбаштык", "өз балдарын камсыздоодон баш тартуу", "соттун чечимин аткарбоо" беренелери менен кылмыш жоопкерчилигине тартылган. 2015-жылдын май айынан тартып "Дамке аттуу уюшкан кылмыштуу топтун мүчөсүн өлтүрдү" деген шек менен ага эл аралык издөө жарыяланган.