Япониялык 74 жаштагы спортчу "Рио-де-Жанейро-2016" Олимпиадасына катышууну көздөөдө

74 жаштагы япониялык спортчу Хироси Хокэцу ат спорту боюнча "Рио-де-Жанейро-2016" Олимпиадасына катышууну көздөөдө. Ал тандоо туруна катышуу өтүнүчү менен уюштуруучуларга арыз берди. Бул тууралуу чет элдик маалымат булактары кабарлайт.

Маалыматка ылайык, эгер ал Олимпиадага жолдомо алып калса, аталган мелдештин эң картаң катышуучусу катары тарыхта калмакчы. Азырынча Олимпиадага катышкан эң картаң спортчу катары швециялык спортчу Оскар Сван аталып келет (ок атуу).

Кошумчалай кетсек, Хокэцу буга чейин Олимпиада оюндарына 3 ирет катышып, байге алган эмес. Алгачкы жолу ал мелдешке 1964-жылы катышса, акыркы жолу "Лондон-2012" Олимпиадасында болгон. Лондонго барган кезде ал 71 жашта эле.