Машыктыруучу Мирлан Эшенов: "Шериктештик Кубогунда быйыл медаль тагынгыбыз келет"

17-январда футбол боюнча жаштар курамабыз (22 жашка курактагы футболчуларыбыз) "Шериктештик Кубогу-2016" мелдешинин алкагында Беларусту 1:0 эсебинде утту. Оюн толук бойдон кыргыз футболчуларынын үстөмдүгү астында өттү.

Беттеш тууралуу команданын башкы машыктыруучусу Мирлан Эшенов төмөнкүлөргө токтолду: "Биз бул мелдешке мыкты даярдыкта келдик. Бишкекте жана Москвада 10 күндөн машыгуу сборун өткөрдүк. Мындай мелдеште алгачкы беттеш психологиялык жактан чоң мааниге ээ. Андыктан машыктыруучулар штабын балдар көрсөткөн жыйынтык толук канааттандырды. Оюндун жүрүшү жана жыйынтыгы кубандырды. Мелдеште алдынкы үчтүккө кирип, медаль тагынууга аракет кылабыз. Биз бул үчүн Беларусь сыяктуу татыктуу команданы утуп, алгачкы кадамды таштадык. Бул жеңиш футболчуларыбызга ишеним берет".