Келдибековдун иши боюнча күбө кыргыз тилинде сүйлөп, судьяга көп нерселер өз убагында которулуп берилбегендигинен улам котормочу алмаштырылды

Келдибековдун иши боюнча соттук отурумга күбө катары экс-депутат Надира Нарматова чакырылды. Ал суракты кыргыз тилинде берип жаткандыгына байланыштуу сот Ирина Воронцовага котормочу орус тилине которуп берүүдө. Күбө тарабынан айтылган көп нерселер судьяга өз убагында жана толук которулбай жаткандыгына байланыштуу ал нааразы болуп, котормочу алмаштырылды.

"Токтомдун долбоору бизге таратылып берилген. Жогорку Кеңештин өкүлчүлүгүнүн ачылышы боюнча добуш берген күнү электр жарыгы өчүп калып, депутат Феликс Куловдун сунушу менен кол көтөрүп добуш бергенбиз. Мен ал жактагы мигранттардын көптүгүн эске алуу менен токтомду колдогом. Менден башкалар да колдошкону эсимде. Ал добуш берүүгө президенттин өкүлү Аида Салянова катышып, каршылыгын билдирген эмес. А.Келдибеков мага добуш бер деп айткан эмес, алдын ала эч кандай сүйлөшүүлөр болгон эмес. Биз добуш бергенбиз. Өкүлчүлүктүн ачылышы мыйзамдуу болгон",- деди Н.Нарматова.