Өзгөндө массалык мушташ катталып, андан 5 күн өткөндөн кийин окуя болгон жерден бойго жеткен жигиттин даракка асылган жансыз денеси табылды

Өзгөн районунда массалык мушташ катталып, андан 5 күн өткөндөн кийин окуя болгон жерден бойго жеткен жигиттин даракка асылган жансыз денеси табылды. Бул тууралуу SUPER.KG'ге 21-январда Ош облустук ички иштер башкармалыгынын басма сөз катчысы Жеңиш Ашырбаев билдирди. Ашырбаев баланын өлүмүнүн массалык мушташка тиешеси жок экенин айтты. Мушташ 9-январда Шералы айылында болгон.

"Асынып өлгөн бала Дөң-Булак айылынын тургуну болуп чыкты. Баланын сөөгү мушташ болгон жайдан табылгандыгы үчүн анын ата-энеси эки окуяны байланыштырып жатышат. Баланын денесинен эч кандай көгөргөн белги байкалган жок. Моюнуна жиптин изи гана түшүп калган. Сөөгүн тиешелүү экспертизага жөнөттүк. Ал жерден жыйынтык чыгарса, анан белгилүү болот. Кылмыш иши ачылган жок",- дейт Жеңишбек Ашырбаев.

Ал эми массалык мушташ жол талашуудан келип чыккан. "Карама-каршы келе жаткан Хонда Аккорд үлгүсүндөгү унаа менен жүк ташуучу Портер унаасынын айдоочулары жол талаша кетишкен. Хонда унаасындагы балдар артка бурулуп келип Портерди токтотуп, анын ичиндегилерди сабоого өтүшкөн. Токмок жегенине арданып калган балдар алыс эмес жердеги досторун чогултуп, кайра келип каршылаштарын сабап, жанындагы буюмдарын (акча, телефон) тартып алышкан. Жабырланган тарап милиция кызматкерлерине арыз менен кайрылган. Мушташ уюштургандарга үч берене боюнча кылмыш иштери ачылып, тергөө жүрүп жатат",- деди Ашырбаев.