Ошто "9 жаштагы балага сексуалдык мүнөздөгү зордук көрсөткөн" деп айыпталган мугалим психикалык жактан жабыркабагандыгы аныкталып, 15 жылга эркинен ажыратылды

Ош шаардык соту "9 жаштагы окуучусуна сексуалдык мүнөздөгү зордук көрсөткөн" деп айыпталган медресенин мурунку мугалимин 15 жылга эркинен ажыратты. Бул тууралуу бүгүн, 21-январда SUPER.KG порталына Ош шаардык сотунун судьясы Байымбет Осмонов билдирди.

"Айыпталуучу 3 жыл бою "психикалык жактан жабыркайт" деп аталып жүрдү, бирок экинчи ирет экспертиза жүргүзүү талап кылынган. Чым-Коргон айылындагы Психикалык ден соолук борбору тарабынан жүргүзүлгөн экспертизанын жайынтыгы боюнча айыпталуучунун акыл-эси соо экени аныкталган.

Ош облустук соту тарабынан айыпталуучу өзүнүн кылган кылмышы үчүн жаза тартууга жөндөмдүү деп табылып, иш кайрадан Ош шаардык ички иштер башкармалыгына жөнөтүлгөн. Шектүүнүн жактоочусу "айыпкер дарыланышы керек" деп Жогорку Сотко кайрылган.

2015-жылдын 25-декабрь күнү болгон соттук отурумда айыпталуучу күнөөлүү деп табылып, күчөтүлгөн режимде 15 жылга эркинен ажыратылды", - дейт Б.Осмонов.

Белгилүү болгондой, аталган кылмыш 2012-жылдын июнь айында болгон. Анда Оштогу медреселердин биринин мурунку мугалими Н.Калыбай уулу "жашы жете элек окуучусуна сексуалдык мүнөздөгү зордук көрсөткөн" деп айыпталган. Окуядан кийин мугалимдин колунда Кызыл-Жардагы Республикалык психиатриялык оорукананын берген психикалык жактан жабыркагандыгы тууралуу аныктамасы бар экени белгилүү болгон.