Хирург бир эмчегин кесип салган Гүлзина Байтаева өзүнүн көйгөйүн Орусиянын телеканалдарына барып айтып берет

Хирург бир эмчегин кесип салган Гүлзина Байтаева өзүнүн көйгөйүн Орусиянын телеканалдарына барып айтып берет. Байтаева журналист Андрей Малаховдун “Пусть говорят” программасына чакырылганын 21-январда SUPER.KG'ге билдирди.

Хирург Зинаида Карабекованын шалаакылыгынан ушул абалга келгенин айтып берүү үчүн бейтап Малаховго кат менен кайрылган. "Мен кат жөнөткөндөн көп өтпөй редакциядан телефон чалышты. Күбөлөрдү, болгон далилдерди чогулта беришимди суранды. Кезегим келгенде өздөрү кабарлаарын айтышты",- деди Байтаева.

Эске салсак, 2014-жылы маммолог врач Зинаида Карабекованын жетекчилиги астында Гүлзина Байтаевага "сол эмчегинен рак болгон" деп операция жасалган. Кийин анализдин жыйынтыгында рак эмес, шишик экендиги тастыкталган. Жабырлануучу акыйкаттык издеп Башкы прокуратурага арыз менен кайрылган. Карабековага карата кылмыш иши ачылып, бирок белгисиз себептер менен жабылып калган.