Акыркы 4 жылда жаш балдарга көрсөтүлгөн зордук-зомбулуктардын саны 4 эсеге азайган

Кыргыз Республикасында жаш балдарга карата зордук-зомбулуктар катталган учурлар акыркы төрт жыл ичинде дээрлик эки эсеге азайган. Бул тууралуу КРнын Социалдык өнүктүрүү министри Кудайберген Базарбаев ЮНИСЕФ Балдар фондунун өлкөдөгү өкүлү Юкиэ Мокуо менен жолугушуу учурунда айтканын министрликтен кабарлашты.

Маалыматка ылайык, 2012-жылы жаш балдарга карата көрсөтүлгөн кордуктардын саны 1345ти түзсө, 2013-жылы 1045ти, 2014-жылы 909ду, 2015-жылы 700дү түзгөн.

Юкиэ Мокуо өткөн жылы балдарга карата зордук-зомбулуктардын алдын алуу максатында 528 штаб түзүлгөнүн, бул жаатта ийгиликтүү иш аткарылып жатканын белгиледи.

Министр К.Базарбаев өкмөт менен ЮНИСЕФтин ортосундагы балдарды коргоо боюнча келишим ушул жылы аяктай турганын, жыл соңуна чейин кийинки жылга карата иш-аракеттердин планын түзүп чыгуу зарылчылыгын белгиледи.