Бийик тоолуу шартта жашап жана иштеп жаткан жарандарга төлөнүүчү коэффициенттердин төмөндөшү тургундар арасында нааразылык жаратууда

"Бийик тоолуу аймактарда жана шарты катаал алыскы аймактарда жашап, иштеп жаткан жарандарга мамлекеттик кепилдиктер жана компенсацияларды берүү жөнүндө" мыйзамга киргизилчү өзгөртүүлөр Нарын облусунун тургундарынын арасында кызуу талкууга алынды. Аталган облустагы айрым мекемелер тиешелүү жактарга бул мыйзамга өзгөртүүлөрдү киргизбөө суранычы менен кат жолдоп жатышкандарын өздүк булактар билдиришти.

"Биздин райондун мектеп кызматкерлери чогулуштарды уюштуруп, жетекчилерге коэффициентти төмөндөтпөө суранычы менен кат жөнөтүшүүдө. Ал эми медицина жана башка бюджеттик жумушчулар тууралуу маалыматым жок. Билишимче, эмгек жамааттарынын көбү сураныч каттарын жолдошууда. Азырынча бюджеттик жумушчулар арасында нааразылыктар жаралганы менен, башка чара көрүү сөзү боло элек. Бул өзгөртүү күчүнө кире турган болсо, чара көрүүгө деле даярбыз. Маяналарыбызды көтөргөнү менен, кайра минтип компенсацияны жокко чыгарып же төмөндөтүп жатышпайбы. Анда эмгек акыны көтөрүүнүн эмне кереги бар?"- дейт өздүк булак.