"Мас абалында МАИ кызматкерлерин тапанча менен коркуткан" деп шектелген Руслан Түмөнбаев убактылуу кармоочу жайга киргизилди

"Мас абалында МАИ кызматкерлерин тапанча менен коркуткан" деп шектелген Руслан Түмөнбаев убактылуу кармоочу жайга киргизилди. Бул тууралуу бүгүн, 22-январда SUPER.KG порталына Бишкек шаардык ички иштер башкы башкармалыгынан билдиришти.

Белгилүү болгондой, 20-январдан 21-январга караган түнү жүргүзүлгөн рейддин алкагында А.Токомбаев көчөсүнөн Лексус 330 үлгүсүндөгү унаа токтотулган. Аны Р.Түмөнбаев башкарып жүргөн. Анын документтерин сураганда тиешелүү документтери жок экени аныкталган. Унаа айып пул төлөөчү жайга токтотулган. Көп өтпөй Р.Түмөнбаев А.Токомбаев көчөсүндөгү блокпостко кайтып келип, МАИ кызматкерлерин тапанча менен коркута баштаган. Спортчуну Республикалык наркологиялык борборго алып келишкенде анын мас абалда экени аныкталган. Ал эми "Стример" үлгүсүндөгү тапанчанын сериялык номуру өчүрүлгөнү жана анын эч кандай документтери жок экени белгилүү болгон.

Факт боюнча "ок атуучу куралдарды, ок-дарыларды, жарылуучу заттарды жана жардыргыч түзүлүштөрдү мыйзамсыз алуу, берүү, өткөрүү, сактоо, ташуу же алып жүрүү" жана "бийлик өкүлүнө карата зомбулук көрсөтүү" беренелери боюнча кылмыш иши козголуп, ал убактылуу кармоочу жайга камакка алынды. Иликтөө иштери улантылууда.