Бишкекте алдамчылык жолу менен 1,4 миллион сомдук унааны тартып алып башкага саткан аял кармалды

Бишкек шаарында алдамчылык жолу менен кымбат баалуу унааны тартып алып башка адамга сатууга шектелип 57 жаштагы аял кармалды. Бул тууралуу бүгүн, 27-январда Бишкек шаардык ички иштер башкы башкармалыгынан билдиришти.

Маалыматка ылайык, милицияга арыз менен К.А. аттуу аял кайрылган. Анда ал Чолпон жана Шааркүл аттуу аялдарга чара көрүүнү өтүнгөн. Анын айтымында 2015-жылдын 25-ноябрында аталган аялдар аны алдоо жолу менен Тойота Ленд Крузер үлгүсүндөгү унаасын тартып алып, тиешелүү документтерин жасап, аны башка адамга сатып жиберишкенин айткан. Келтирилген чыгымдын жалпы суммасы 1 миллион 400 миң сомду түзгөн.

Бул факт боюнча кылмыш иши козголгон. Жүргүзүлгөн иликтөө иштеринин алкагында кылмышка шектүү катары 57 жаштагы Шааркүл О. кармалган. Учурда бул факт боюнча иликтөө иштери жүрүүдө.

Октябрь райондук ички иштер башкармалыгы, шаардын тургундары жана коноктору бул аялдан жабыркаган болсо, төмөнкү номурларга билдирүүнү өтүнөт: (0554) 102 256, (0554) 102 182.