"Жарандык никедеги аялын зордуктады" деп 14 жылга кесилгенден кийин оозун тигип, ачкачылык жарыялаган жарандын соту 2-февралда болот

Соттун өкүмүнө макул болбой 8-январда оозун тигип, ачкачылык жарыялаган жарандын иши боюнча экинчи инстанциядагы соттук отурум 2-февралда Бишкек шаардык сотунда болот. Бул тууралуу 27-январда жактоочулардын бири Майрамбек Жумабеков маалымдады.

Окуяга токтолсок:

2015-жылдын 2-ноябрында Бишкектин Ленин райондук соту "зордуктоо", "уурулук" беренелери боюнча айыпталган Таалайбек Сыдыковду 14 жылга эркинен ажыраткан. Тергөөдө айыпталуучу күнөөсүн мойнуна алган эмес. Ал жабырлануучу Венера Дайдакеева менен таанышып, нике кыйдырып үйлөнүшкөнүн айткан. Мындан сырткары борбор калаадагы Дмитриева көчөсүндө жайгашкан №15-үйдөн батирди ижарага алып жашап жатышканда 10 күндөн кийин уруша кетип, аялы милицияга арыз жазганын билдирген.

Жактоочулардын айтымында, жабырлануучу 2015-жылдын 23-январында жазган арызында күйөөсү сабап салганын, кайра 29-июндагы арызында сабап, зордуктаганын жана акчасын уурдап кеткенин жазган.

Бүгүнкү маалымат жыйынында жактоочу Майрамбек Жумабеков: "Иликтөөнүн жүрүшүндө айыпталуучуга карата дооматы жок экенин айтып, кылмыш ишин токтотууну суранган. Ошондой эле соттук отурумдарга катышкан эмес. Соттук отурумдун жүрүшүндө күбөлөр Т.Сыдыков менен В.Дайдакеева чогуу жашашканын, молдо алардын никесин кыйгандыгын далилдешти. Сот А.Н.Жоошбеков күбөлөрдүн көрсөтмөлөрүн эске албай, айыпталуучуну 14 жылга кести. Өкүмгө макул болбогон Т.Сыдыков №1-СИЗОдо оозун тигип, расмий түрдө ачкачылык жарыялады. Азыр анын абалы оор. Сот акыйкатсыз чечим чыгарганын айтып Акыйкатчы институтуна кайрылдык",- деди.

Борбордук мечиттин өкүлү Эргеш ажы 12-июнда айыпталуучу менен жабырлануучунун никеси күбөлөрдүн катышуусунда кыйылганын айтты. "Алар мечитке келгенде имам башка иштер менен кеткен эле. Өзүбүздүн адамдар күбө болуп, экөөнүн макулдугу менен мен алардын никесин кыйгам. Т.Сыдыков никедеги аялынын жообун бербесе, шарият боюнча ал азыр да аялы болуп саналат",- деди.

Жактоочулар соттук отурумда далил катары борбордук мечиттен никеси кыйылгандыгы тууралуу күбөлүктү көрсөтүшкөн. Күбөлүк 2015-жылдын 16-сентябрында алынган. Анда 39 жаштагы Таалайбек Сыдыков менен 38 жаштагы Венера Дайдакеева 12-июнда никесин кыйдырышканы жазылып, ага борбордук мечиттин имамы кол койгон.