Бишкекте уурулук жана акча талап кылуу менен алектенген балдар кармалышты

Бишкекте уурулук жана акча талап кылуу менен алектенген топ кармалды. Бул тууралуу бүгүн, 27-январда Бишкек шаардык ички иштер башкы башкармалыгынан билдиришти.

Маалыматка ылайык, милицияга арыз менен Казакстандын 28 жаштагы жараны кайрылган. Анда ал белгисиз жарандар анын Лексус RX 330 үлгүсүндөгү унаасынын мамлекеттик номурун уурдап кетип, аны кайтарып берүүгө акча талап кылып жатканын билдирген.

Бул факт боюнча кылмыш иши козголуп, жүргүзүлгөн иликтөө иштеринин алкагында кылмышка шектүү катары 22 жаштагы Д.Дастан жана 19 жаштагы С.Эрлан кармалган. Учурда мындай факт боюнча дагы эки арыз келип түшкөн. Иликтөө иштери улантылууда.

Октябрь райондук ички иштер башкармалыгы бул жигиттерден жабыркагандар болсо, төмөнкү номурларга билдирүүнү өтүнөт: (0554) 102 329, (0550) 102 349, нөөмөт бөлүмү: (0312) 52-29-00.