Чүй. Чана тээп жүрүшкөндө муз жарылып, сууга кулашкан эки кыздын бири жардамга келгендердин аракети менен аман калган

Чүй облусунун Панфилов районунун Кайыңды шаарында чана тээп жүрүшкөндө муз жарылып, сууга кулашкан 7 жана 11 жашар кыздардын бири жардамга келгендердин аракети менен аман калган. Бул тууралуу Өзгөчө кырдаалдар министрлигинин басма сөз кызматы билдирди.

Маалыматка ылайык, окуя 12-январда орун алган. 2004-жылы туулган Р.А. аттуу жана 2008-жылы туулган М.С. аттуу эки кыз көлмөнүн жанында чана тээп жүрүшкөн. Андан соң кыздар музга барышканда муз жарылып кетип, алар сууга түшүп кетишкен. Кыздардын кыйкырыктарын уккан жергиликтүү тургундар Айбек Бактыбеков жана Талант Самарбеков куткарууга чуркап келишкен. Алар сууга кирип, кыздарды жээкке чыгарып, "Тез жардам" кызматын чакырышкан. 11 жашар Р.А. ага биринчи жардам көрсөтүлгөнүнө карабай көз жумган, ал эми 7 жашар М.С. аттуу кыздын абалы канааттандырарлык.

"Панфилов райондук мамлекеттик администрациясынын демилгесинин негизинде Айбек Бактыбеков менен Талант Самарбековду эрдик көрсөткөнү үчүн ӨКМнын "Чөгүп бара жаткан адамды куткаргандыгы үчүн" медалы менен сыйлоо маселеси учурда каралууда",- деп билдирет мекеме.