"Салык төлөөдөн качты" деп камалган "Жунда" заводунун башчысынын орун басары үй камагына чыгарылды

Бишкек шаардык соту 27-январда Кара-Балта шаарындагы "Жунда" мунайды кайра иштетүүчү заводунун башчысынын орун басарын үй камагына чыгарды. Маалыматка таянсак, айыпталуучу Ю Шан Ли учурда эркиндикте.

Эскерте кетсек, Экономикалык кылмыштар менен күрөшүү кызматы "салык үчүн 54 миллион сомду төлөбөй, документтерди жашырган" деп айыптап, аталган жооптуу кызматкерге иш козгогон. Бишкектин Биринчи Май райондук соту аны 2 айга СИЗОдо кармоо чечимин чыгарып, заводдун иши убактылуу токтотулган эле. Маселе жакында парламентте талкууланып, депутаттар завод жетекчисинин орун басарын камакка алууну аша чапкандык катары баалашкан эле. "Аны үй камагына чыгарып коюп деле тергөөнү жүргүзө берсе болот. Минте берсек инвестордун баарын чочутабыз",- дешкен көпчүлүк депутаттар.