Валентина Шевченко мартта 8 бурчтукта Бразилиянын өкүлү менен беттешет

Кыргыз жеринен чыккан атактуу спортчу Валентина Шевченко эрежесиз эр уруштун UFC сериясында кезектеги беттешин өткөрөт. Ал 5-мартта АКШда өтө турган UFC 196 мелдешинин алкагында 8 бурчтукка чыкмакчы. Мелдештин расмий сайты кабарлагандай, 62 килограмм салмактык бөлүктө анын атаандашы бразилиялык Аманда Нунез болот.

Эрежесиз эр уруш боюнча мелдештерге катышкан спортчулардын рейтингин түзгөн Sherdog порталынын маалыматына ылайык, 62 килограмм салмактагы спортчу кыздардын катарында Нунез рейтинге 6-орунду ээлеп турат. Буга чейин ал жалпы эрежесиз эр уруш боюнча 11 ирет жеңишке жетишип, 4 ирет жеңилүү ызасын тарткан.

Ал эми 12 беттеште жеңип чыгып, 1 ирет жеңилген Валентина Шевченко аталган рейтингде 7-орунда турат. Валентина UFC мелдешинин алкагында 1 гана жолу 8 бурчтукка чыгып, декабрда канадалык Сара Кауфманды утуп алган.