Кайрат Примбердиев орус элин Елена Ваенганын концертинде таң калтырды

Кайрат Примбердиев популярдуу орусиялык ырчы Елена Ваенганын туулган күнүндөгү концертинде "Я любил одну милую" аттуу ырды аткарып баарын таң калтырды. Ырчы концерттеги видеосун өзүнүн социалдык тармактагы баракчасына жайгаштырган. Видеодон аны колдогон көрүүчүлөрдүн катуу кол чабууларын угууга болот. Ал эми Елена Ваенга бир ырды ырдоо үчүн алыстан учуп келген Кайратка ыраазы болду. "Мен анын алыскы кыргыз өлкөсүнөн бир ыр үчүн учуп келгенине ыраазымын",- деди Елена Ваенга.

Андан соң Кайрат Примбердиев элдин суроосу боюнча дагы башка ырларды аткарып, кече ээсин туулган күнү менен куттуктап, ийгилик каалады. Көрүүчүлөргө кыргыз жергесинен ысык салам жолдогондо, анын дарегине "Азамат!", "Браво!" сыяктуу мактоо сөздөрү айтылып, алардын сүймөнчүгүнө ээ болду.