Өөн жорук: Орусиядагы айтылуу теке депутаттыкка ат салышат

Жолборс менен "достошкон" айтылуу теке - Тимур Алыскы Чыгыш федералдуу округунан Орусиянын Мамлекеттик Думасынын депутаттыгына ат салышат.

Мындай чечимди теке байырлаган Приморск сафари-багынын директору Дмитрий Мезенцев кабыл алганын орусиялык ММКлар жарыялашты.

Теке шайлоого өзүн өзү көрсөткөн талапкер катары катышмакчы. "Албетте, билем, текеден "толк" деле чыкпайт. Бирок азыркы депутаттардан деле "толк" чыкпай жатпайбы. Аларга караганда теке Тимурдун зыяны азыраак болот. Ал жалган айтпайт, уурдабайт, сөз менен элдин башын айлантпайт",- дейт Мезенцев.

Директор депутаттыкка өткөн теке добуш берүүлөргө катыша аларын айтат. "Куйругун өйдө көтөрсө "макул", ылдый түшүрсө "каршы", жерге тийгизип алса "добуш берген жок" дегенди билдирет. Депутаттар өздөрүнүн чечими үчүн жоопкерчилик тартышпайт. Тимур деле ошолор сыяктуу өзүнүн жүрүш-турушу үчүн жазага тартылбайт",- дейт сафари-бактын жетекчиси.