МАИчини унаасынын капотунда сүйрөп кеткен айдоочу кармалып, милициянын суроолоруна жооп берди

Бишкекте МАИчини унаасынын капотунда сүйрөп кеткен айдоочу колго түштү. Бул тууралуу бүгүн, 30-январда SUPER.KG порталына Бишкек шаардык жол-кайгуул кызматынын басма сөз катчысы Атыр Бекмурзаева билдирди.

"Жүргүзүлгөн иликтөө иштеринин алкагында МАИчини унаасынын капотунда сүйрөп кеткен айдоочу - 1993-жылы Нарын облусунда туулган Адилет Максүтов кармалды. Ага карата Кылмыш-жаза кодексинин "укук коргоо органынын кызматкеринин же аскер кызматкеринин өмүрүнө кол салуу" беренеси боюнча кылмыш иши козголуп, кылмышка шектүү убактылуу кармоочу жайга киргизилди. МАИ кызматкери ооруканада. Учурда бул факт боюнча тергөө амалдары жүрүүдө",- деп айтылат маалыматта.

Суракта А.Максүтов милиция кызматкерлеринин суроолоруна төмөнкүдөй жооп берди:

"ЦУМдун жанында токтоп турсам, МАИ кызматкерлери келип документимди сурашкан. Ары жактан орун бошоп, ошол жерге унаамды токтотоюн десем, МАИчилер "Алдынан тос!" деп башташты. Бири келип капотко секирип, тапанчасын такады. Чочуп кетип, айдап кетип калгам. Жанымда эч нерсе жок болчу. Нес болуп калдым. Кылган ишиме өкүнөм".

Айта кетсек, 28-январь күнү интернетке айдоочу унаасынын капотунда Жол-кайгуул кызматынын кызматкерин сүйрөп жүргөнү тартылган видео тараган. Анда айнектери караңгылатылган унаанын айдоочусу капотундагы МАИ кызматкерине карабай ылдамдыгын бирде жогорулатып, кайра жайдан айдаганы көрсөтүлгөн.