Теннис боюнча Австралиянын Ачык биринчилигин немис спортчусу утту, ал финалда Серена Уильямсты жеңди

Германиялык теннисчи Анжелика Кербер Чоң шлем түркүмүнө кирген 4 мелдештин бири Австралиянын Ачык биринчилигин жеңип алды. Ал кыз-келиндер арасындагы мелдештин финалында дүйнөнүн 1-ракеткасы америкалык Серена Уильямсты утту (6:4, 3:6, 6:4).

Мелдештин расмий сайты кабарлагандай, беттеш 2 саат 8 мүнөткө созулду. Муну менен 28 жаштагы немис спортчусу карьерасында алгачкы жолу Чоң шлем түркүмүндөгү мелдеште жеңишке жетишти.

34 жаштагы С.Уильямс карьерасында 6 ирет аталган мелдеште жеңүүчү аталган (2003-жылы, 2005-жылы, 2007-жылы, 2009-жылы, 2010-жылы, 2015-жылы). Анын эсебинде Чоң шлем мелдештеринде 21 чемпиондук наам бар.