Сириянын Дамаск шаарына жакын жердеги 3 жардыруудан каза тапкандардын саны 76га жетти

31-январда Сириянын Дамаск шаарына жакын жерде 3 жардыруу орун алды. Мунун кесепетинен каза тапкандардын саны 76га жетти. Буга кошумча жаракат алгандардын саны 110ду түзөт. Бул тууралуу чет элдик маалымат булактары кабарлайт.

Маалыматка ылайык, бир жардыруу аялдамага коюлган жардыруучу заттын активдештирилгенинен улам болгон. Ал жерде жабыр тарткандарга жардам берүү үчүн эл чогулганда 2 жан кечтинин белине катылган жардыруучу заттар активдештирилген. Жардыруулар боюнча жоопкерчиликти "Ислам мамлекети" өзүнө алды.

Кошумчалай кетсек, Сирияда согуштук аракеттер 2011-жылдан тарта уланып келет. Бул жылдар аралыгында жалпы 220 миң адам каза тапкан.