Бишкектин Бөкөнбаев-Исанов көчөлөрүндө октон каза болгон адам таанышынын унаасына отурганда аны атып кетишкен

1-февралда борбордогу Бөкөнбаев менен Исанов көчөлөрүнүн кесилишинде атылып өлтүрүлгөн жаран Бишкек шаарынын тургуну, 1976-жылы туулган С.П. экени аныкталды. Бул тууралуу Бишкек ШИИББинин басма сөз кызматы билдирди.

Азыркы тапта факт боюнча соттук-медициналык экспертиза дайындалды. Алдын ала маалыматтар боюнча, анын башына, далысына, төшүнө ок тийген. Белгилүү болгондой, маркум күндүз унааларда жүк ташуу менен алектенген ишканадагы таанышына келген. Алдын ала маалымат боюнча, саат 20:45 чамасында кызматкерлер ишканадан чыкканда С.П. аттуу жаран да ал жактан чыгып, таанышына тиешелүү Опель Астра унаасына отурган. Ок атылган учурда ишканадан чыгып келе жаткан унаанын ээси качып барып башка унаага отурган адамды көргөн. Өзүнүн унаасына келгенде таанышы октон жаракат алганын көргөн. Аны ооруканага алып келишкенде дарыгерлер жаракат алган жаран каза болгонун айтышкан.

Учурда окуя боюнча кылмыш иши козголуп, соттук-баллистикалык, соттук-биологиялык экспертизалар дайындалды.