Оозун тигип, ачкачылык жарыялаган жарандын соту 22-февралга жылдырылды

Соттун өкүмүнө макул болбой оозун тигип, ачкачылык жарыялаган жарандын иши боюнча экинчи инстанциядагы соттук отурум 2-февралда Бишкек шаардык сотунда болмок. Бирок айыпталуучу Таалайбек Сыдыков соттук процесске келе албагандыгына байланыштуу сот отуруму 22-февралга жылдырылды. Ишти Бишкек шаардык сотунун судьясы Жаңыл Мамбеталы карап жатат. Азыркы тапта №1-СИЗОдо отурган Т.Сыдыков ачкачылыгын токтото элек. Бул тууралуу 3-февралда SUPER.KG порталына жактоочулардын бири Майрамбек Жумабеков маалымдады.

Эске салсак, 2015-жылдын 2-ноябрында Бишкектин Ленин райондук соту "зордуктоо", "уурулук" беренелери боюнча айыпталган Таалайбек Сыдыковду 14 жылга эркинен ажыраткан. Тергөөдө айыпталуучу күнөөсүн мойнуна алган эмес. Соттун чечимин акыйкатсыз деп ал 8-январда оозун тигип, ачкачылык жарыялаган.